مشكلة معظم البنات الصبح تقريبا هي ضيق الوقت واننا بنبقى عايزين نعمل كل حاجة بسرعة عشان نلحق مواعيدنا سواء جامعة او شغل, واكيد مافيش واحدة هتضحي بوقت نومها وتصحى بدري شوية عشان تعمل مكياج, عشان كده النهاردة بنات حوا هتسهل عليكي المهمة دي وجايبين لكم روتين مكياج صباحي سريع وفي نفس الوقت تطلعي بلوك حلو.
روتين مكياج صباحي سريع:
1- التنضيف والترطيب:
اول واهم حاجة والاساس في الروتين الصباحي هي تنضيف البشرة بالغسول المناسب عشان ننضف بشرتنا من اي زيوت زيادة او تراكم اوساخ اللي ممكن تسد المسام وتسبب لنا مشاكل, والافضل تستخدمي منظف خفيف على البشرة ميسببش جفافها, بعد التنضيف استخدمي الكريم المرطب المناسب لنوع بشرتك.
2- الثلاثي الذهبي:
طبعا الصبح مافيش الوقت انك تحطي منتجات كتير على البشرة وكمان ضروري انك تختاري المنتجات المناسبة لفترة الصبح, يعني ابعدي عن الكونتور والهايلايتر, حتى رسم الايلاينر حاولي تتخطيه في مكياجك الصباحي لانه بيحتاج وقت عشان تظبطيه, والحيلة هنا هي “الثلاثي الذهبي” يعني تختاري 3 منتجات بس اللي انتي شايفة انهم هيدارو عيوب بشرتك كويس ويطلعوكي بلوك حلو, وطبعا ال 3 منتجات دول هيختلفوا من بنت للتانية حسب احتياج كل بشرة.
– خطوات مكياج سريع:
– الفونديشن او كريم الاساس:
لو عندك عيوب في البشرة اختاري فونديشن تغطيته كويسة او عالية يغطي لك كل العيوب بدل ما تحطي اكتر من منتج, وبكده هتختصري في الوقت وتحطي منتج واحد على البشرة بدل كذا منتج.
– الكونسيلر:
لو بتعاني من هالات سودا او بثور استخدمي الكونسيلر عشان تخفيها, ولو بشرتك نقية ومافيش عيوب محتاجة تغطية ممكن تستغني عن الفونديشن وتكتفي بس بالكونسيلر.
– البودرة:
في حالة لو بشرتك دهنية او مختلطة استخدمي بودرة فوق كريم الاساس, هتضمن ان بشرتك تفضل من غير لمعان طول اليوم.
– قلم الحواجب:
قلم الحواجب من اسهل المنتجات اللي هتساعدك تظبطي حواجبك بشكل سريع, ولو انتي حواجبك مش محتاجة تترسم ممكن تتخطي الخطوة دي, لان زي ما قولنا اختاري بس اللي محتاجاه عشان توفري في الوقت.
– الماسكارا:
الماسكارا تعتبر طريقة سريعة لاظهار العيون, من غير وقت ولا مجهود.
بعد ما شوفنا الخطوات السريعة دي هنقدر نعمل مكياج الصبح من غير ما ياخد مننا اي وقت, يعني بصي للعيوب اللي في بشرتك واعرفي هي محتاجة ايه بس, لو بشرتك مثلا بتعاني من البثور, والهالات السودا, والزيوت الزيادة, وعدم توحد اللون, وحواجبك محتاجة تظبيط, زي ما قولنا اختاري ال 3 منتجات اللي هيحلوا لك المشاكل دي كلها.
لو عندك اي مشاكل في الجلد حطي فونديشن تكون تغطيته من اول المتوسطة لاعلى, ولو في بثور بسيطة داريها بالكونسيلر, وبعدين حطي الماسكارا, ودي تعتبر ال3 منتجات الاساسين في روتين المكياج الصباحي.
وخلي دايما ال 3 منتجات اللي اختارتيهم واستخدمتيهم في شنطتك عشان تقدري تصلحي مكياجك وانتي بره البيت.
