الرئيس السيسى : الدولة معنية باستعادة كفاءة جميع البحيرات للخدمة والانتاج

أكد الرئيس عبد الفتاح السيسي، اليوم الأربعاء، إن الدولة معنية باستعادة كفاءة كل البحيرات للخدمة والانتاج .

وقال الرئيس السيسي- خلال افتتاح عدد من المشروعات القومية في مجال الإنتاج الحيواني المتكامل بمحافظة الفيوم – ” أنا لسه كنت بتكلم مع دولة رئيس الوزراء ومحافظ الفيوم على بحيرة قارون وأنا بقول الكلام بس وبسجله لينا كلنا لكل اللى بيسمعنا .. احنا بنتكلم عن بحيرة مساحتها أكثر من 50 ألف فدان .. لو احنا استمرينا على الوضع القائم دلوقتي احنا كده بنخسر هذه البحيرة تماما .. فأنا عاوز أقول إن الدولة معنية زي ما قلت مرة قبل كده تستعيد كل البحيرات سواء اللي كانت على البحر المتوسط أو حتى داخل الدولة بما فيها حتى بحيرة ناصر الموجودة في أسوان .. بنعمل كده ليه .. ممكن يكون فيه إنفاق الناس متحسش أو مفيش عائد مباشر للمواطنين عليه .. انما في عائد للدولة إن تبقى بحيراتها تعودة مرة ثانية للخدمة والانتاج “.

وأضاف السيسي:”احنا المفروض تتعمل مجموعة مصانع علشان تقلل كثافة الملوحة الموجودة في البحيرات دي بحيث انها تعود مرة تانية ويكون انتاجها للثرورة السمكية بشكل أفضل من الواقع اللي احنا موجودين فيه ..وكمان منفقدش البحيرة تماما وتبقى ملوحتها غير قابلة للحياة بعد كده .. أنا بس عايز الكلام ده ليه .. لان الكلام ده تكلفته كثير .. أنا بتكلم على استعادة كفاءة البحيرات .. زي ما قلت في بداية الكلام يمكن لا يوجد عائد مباشر دلوقتي لكن بعد أربع أو خمس سنين عندما ترجع البحيرة دي مرة مرة تانية ويبقى فيه انتاج للأسماك هيبقى فيه فرص أفضل .. فاحنا شغالين على ده ..وانا بقول دراسات الجدوي بتاعتنا في هذا الأمر ليس شرطا أن يكون هناك عائد اقتصادي عالي من المشروع بقدر ما يكون هدفنا في مثل هذه المشروعات استعادة البحيرات بوضعها الانتاجي والصحي بشكل الصحيح”.

وقال الرئيس السيسي ” إن النقطة الثانية التي أرغب التحدث فيها هي عن التوزيع الجغرافي للمشروعات الهدف منها إيجاد فرص عمل في تلك المناطق ، فمثلا محافظة الفيوم تم تنفيذ مشروع مجمع الانتاج الحيواني فضلا عن مشروع آخر يتم على مسافة 40 كيلومترا خاص بالصوب الزراعية” ..وعلق اللواء مصطفى أمين مدير جهاز مشروعات الخدمة الوطنية أنها تقدر بـ 3 آلاف صوبة على مساحة 15 الف فدان.

وأضاف الرئيس السيسي قائلا “إن الصوبة الواحدة بحاجة من 20 إلى 30 شخصا ، حيث تحدثنا عن محافظات الصعيد الاكثر احتياجا لم نستهدفها ببرامج كتكافل وكرامة فقط، إن الهدف من هذا الحديث إيضاح الصورة للمواطنين حين تبدأ الدولة بالتدخل كي تعيد وتساهم في إيجاد حلول حقيقية وفرص عمل حقيقية ، فلينظر الجميع الى التوزيع الجغرافي للمشروعات”.

وتابع الرئيس السيسى : إننا حين نتحدث عن الـ3 آلاف صوبة زراعية تحتاج من 40 ـ الى 50 الف فرصة عمل ، بالاضافة الى الانتاج الحيواني الذي نتحدث عنه، والان نتحدث عن العمل في مشروع زراعي كبير في بني سويف والمنيا ، وأكرر هذا الكلام لايضاح مدى التعامل مع التحديات التي تقابلنا، أن الهدف من هذا المشروع رفع من فرص التشغيل هناك”.

ومضى الرئيس يقول :” قد يتساءل بعض المواطنين الاستهداف من تكليف الجهاز باقامة بعض المشروعات هل هو الاستحواذ الاقتصادي أم إيجاد فرص عمل وحل بعض المسائل وتحقيق توازن ، اقول هذا الكلام لانه بعد افتتاح اي مشروعات يكون هناك نقاشات وتساؤلات عن وجود فرص لبقية القطاعات ، وأؤكد أن كل المشروعات التي نفتتحها نحن على استعداد لدخول القطاع الخاص إذا رغب في المشاركة، ان المشروعات تم الانتهاء منها وتنتج وناجحة “.

وقال الرئيس السيسي “إن شركات القوات المسلحة أو شركات جهاز الخدمة العامة هتنزل البورصة المصرية ، وبذلك لم نتح الفرصة فقط للقطاع الخاص بل لكل المواطنين”.

وأضاف :”أتطرق مرة أخرى لبني سويف والمنيا نحن نتحدث عن 61 الف فدان، وأنا قلت للمحافظين فلتعرضوا علي هذا المشروع حتى نبدأ العمل فيه خلال سنة ، ان تكلفة المشروعات الخاصة ببني سويف والمنيا قد لا تكون مجدية اقتصاديا لاننا نتحدث عن محطة رفع مياه (من عمق) 100 متر ، محدش بيعمل كده ولا يوجد قطاع خاص مستعد يدخل للصرف على محطة أرقام هائلة استثماراتها قد لا تعود ، إن المحطة تتكلف 400 او 500 مليون جنيه لرفع المياه ، احنا قلنا اننا نرغب في إيجاد فرص عمل ، فاصبح الاستثمار والعائد ليس فقط المباشر من المشروع ولكن العائد الاقتصادي الذي يترتب عليه تشغيل عدد من المواطنين في المنيا وبني سويف قد يتراوح من 200 الى 250 ألف إنسان وهو مرتبط بتوفير الارض المناسبة والقريبة من نهر النيل”.

وتساءل الرئيس السيسي قائلا:- “لماذا نتصدى لبعض المشروعات”؟ لأن المشروعات دي قد لا تكون من منظور القطاع الخاص اقتصادية… طيب هما مستعدين يبقوا موجودين معانا فيها..أوي كل المشروعات الموجودة واللي بنفتتحها دي متاحة للقطاع الخاص وهي انتهت يعني جاهزة للي عايز يتفضل أهلا وسهلا “.

وفيما يتعلق بالمركز البحثي قال الرئيس السيسي ، ” احنا بنجيب السلالات دي كلها من بره فأنا عايز أقول إن الإنتاج بتاع الألبان على سبيل المثال لأى سلالة بنجيبها من الخارج قد يتضاعف 3 مرات أو أكثر من الإنتاج الوطني (السلالة المصرية).

من جانبه، استأذن اللواء مصطفى أمين مدير جهاز مشروعات الخدمة الوطنية، الرئيس السيسي في الحديث، قائلا “إنه من خلال التسع مزارع الجاري إنشاؤهم حاليا، والتي سيتم افتتاحهم على عدة مراحل انتهاء بعام 2020 بنجيب سلالات من برة ونعملها تحسين وراثي بهدف جعل الإنتاج والتكاثر يصبح محلي في مصر، وحتى نبتعد عن تكبير رؤوس حية جاهزة للذبح من الخارج .

فيما رد الرئيس السيسي قائلا، “أنا بقول كدا لأننا كوزارة زراعة وقطاع خاص معني بالموضوع دا، مهم أوي أننا نرتقي بالسلالات المحلية عشان تصل بانتاجها وتصبح قريبة للسلالات العالمية لأننا لو قدرنا نعمل دا هنقدر نخلي بدل ما في الريف ينتج 15 كيلو أو 20 كيلو في اليوم نوصل لـ60 أو 70 كيلو مش كدا؟ ” .

بدوره أوضح اللواء مصطفى أمين ، أنه في انتاج الألبان بنحقق 37 و38 كيلو في اليوم ولكن في المزارع وعند صغار المربيين بيحققوا أقل من ذلك، فيما رد السيسي قائلا “عشان كدا هو مش بيحس بالعائد بتاعها “.

واستطرد السيسي قائلا “النقطة الأخيرة أنا عايز أقول اننا عايزين نستفيد من خلال الجامعات ووزارة الزراعة مع بعضنا ، عشان نيجي بعد سنة نقول احنا عملنا استنباط سلالات في اللحوم بتعمل كذا وفي إنتاج الألبان بنعمل كذا… يعني ميبقاش كل الكلام اللي احنا عملناه دا ولا نجد عائد مباشر نشوفه لصالح مواطنينا بحيث اننا نبتدي ننشر الكلام دا على المواطنين وصغار المزارعين “.

وأردف السيسي قائلا “أنا بس حبيت أقول الكلمتين دول عشان لما اتكلمنا في الموضوع دا من 3 سنوات وقولنا اننا محتاجين نعمل توازن بين العرض
والطلب عشان الأسعار لا تزيد دا كان أحد أهم الأهداف وأتصور إن الأمور ماشية كدا والأسعار استقرت “.

ووجه السيسي حديثه للواء مصطفى أمين قائلا بخصوص إنتاج كافة أنواع منتجات الألبان التي يتم استيرادها، قول للناس، فيما أوضح اللواء أمين أنه يتم حاليا إنشاء مصنعين لمنتجات الألبان بطاقة 240 ألف طن- سنة… مصنع منهم لجميع أنواع منتجات الألبان والجبن الأبيض بالإضافة إلى اللبن المعبأ وعلى الجانب الأخر المصنع الثاني في برج العرب لانتاج الجبن الجاف ونصف الجاف بالإضافة إلى أنه سيتم إنتاج المادة الفعالة وهي البروتين والشرش الداخل في صناعة ألبان الأطفال الفئات العمرية 6 شهور وال12 شهر ودا بنعمله بالتنسيق مع وزارة الصحة ” .

واختتم السيسي قائلا “ونحن متفقين على نهاية السنة القادمة كله هيبقى خلصان … شكرا جزيلا” .

المصدر : أ ش أ